Мэдээ мэдээлэл

“АЛТАЙН ХУРД-2016” БАРУУН БҮСИЙН УРАЛДААН АМЖИЛТТАЙ ЗОХИОН БАЙГУУЛАГДЛАА

Монгол Улсын Засгийн газрын шийдвэрээр тус аймагт 4 дэх удаагаа зохион байгуулагдаж байгаа баруун бүсийн хурдан морины уралдааныг Монголын Морин спорт, Уяачдын холбооны удирдлага чиглэлийн дагуу гурвалсан гэрээ байгуулж, аймгийн Иргэдийн төлөөлөгчдийн хурлын Тэргүүлэгчдийн хурлаар комисс томилуулан бэлтгэлийг хангаж, гэрээний заалт, уралдааны дүрмийг хэрэгжүүлэн амжилттай зохион байгуулагдлаа

2016 оны 7 сарын 29, 30, 31-ний өдрүүдэд Говь-Алтай аймгийн төв Алтай хотод зохиогдсон уг уралдаанд улсын нийслэл, 17 аймгийн нийт 84 сум дүүргийн уяачдын уясан 1300-аад хурдан хүлэг бүртгүүлснээс нас насанд дараах морьд уралдав.

Үүнд:

1. Эрлийз дээд нас 40     (22 км)

2. Эрлийз дунд нас 54    (14 км)

3. Эрлийз бага нас 30    (11 км)

4. Азарга 161                 (22 км)

5. Их нас 230                  (25 км)

6. Соёолон 185              (22 км)

7. Хязаалан 204            (18 км)

8. Шүдлэн 186               (14 км)

9. Даага 170                 (11 км)  Бүгд 9 насны 1260 хүлэг уралдсан.

“Алтайн хурд-2016” баруун бүсийн уралдаанд анх удаа эрлийз морьдыг тусад нь уралдуулж, морьдыг шүдлэх, үүлдэрлэг байдлыг тогтоох тусгай комисс томилж ажиллуулсан нь нэгэн онцлог болсон юм.

Эрлийз морьдыг эхний өдөр гурван ангиллаар уралдуулсан бөгөөд дараагийн өдрүүдэд монгол морьдын уралдаанд уралдахаар үлдсэн байсан зарим морьд сэрвээний өндөр, гаднах байдал гэсэн шалтгаанаар хасагдсан болно. Ингэж ажиллахад уг комисст тулгарах бэрхшээл байсан боловч, асуудлыг шийдвэрлэхэд ММСУХ-оос томилогдсон хяналт тавьж ажилласан (Дэд ерөнхийлөгч Ц.Туваан, тэргүүлэгч Д.Цэрэнжигмэд, С.Ганболд нар) мэргэжлийн туслалцаа, дэмжлэг үзүүллээ.

Аймгийн МСУХ бүсийн уралдааны төсөв санхүүг бүрдүүлэхэд хүчин чармайлт тавьсны үр дүнд Монгол Улсын Тод Манлай Уяач Д.Ганбаатар, Д.Цэрэнжигмэд, Бат-Эрдэнэ, Монгол Улсын Манлай Уяач Т.Гантөмөрийн, Туушин компанийн захирал Н.Зоригт Дэвжих трейд ХХК-ийн захирал М.Ганболд Монгол Улсын Алдарт Уяач А.Ариунсайхан Монгол Улсын Алдарт Уяач Л.Батмөнх нар ивээн тэтгэж оролцлоо

Мөн гэрээний дагуу Аймгийн төвийн Есөнбулаг сумын 5 багийн уяач гаралтай, амьдралын боломж тааруу 5 иргэнд  ММСУХ-ны дэд ерөнхийлөгч Х.Бат-Эрдэнэ хөрөнгийг гаргаж, 2 модон ор, ширээ, сандал, авдар,шал бүхий 5 ханатай, 5 өргөө цагаан гэрийг баяр наадмын үеэр гардуулан өгсөн юм.

Наадам зохион байгуулах ажлын хүрээнд уралдаанч хүүхдүүдийн аюулгүй байдлыг хангахад Хүүхдийн байгууллагатай хамтран онцгой анхаарч үндсэндээ 100% хамгаалах хэрэгсэлтэй уралдуулсны дээр гарааны тоног төхөөрөмжөө 20 метрээр уртасгаж, 30 см-ээр намсган, айргийн морьдын хашааг төмөр тороор хийлгэн томсгож, үүлдэрлэг байдлыг тогтоох хашаа, морь бариачдын хувцас, пайз, цоллооочийн малгайг шинээр хийлгэн хэрэглэлээ.

Нутагтаа зохион байгуулагдаж байгаа энэхүү даншиг наадамд хүрэлцэн ирж оролцсон Монгол Улсын Тод Манлай Уяач Д.Ганбаатар, Д.Цэрэнжигмэд, Х.Бат-Эрдэнэ, Манлай уяач Ц.Бааст, Т.Гантөмөр, улсын алдарт уяач Ж.Жигжид, Д.Пүрэвдорж, Л.Батмөнх, А.Ариунсайхан, Д.Алтансүх нарын арван хүнд Аймгийн МСУХ-оос бүрэн хэрэглэлтэй морь бэлэглэсэн нь олны талархлыг хүлээлээ. Баяр наадмын үйл ажиллагааг ETV–ээр орон даяар шууд дамжуулан үзүүлж сурталчилав.

 Энэхүү аймгийн баяр наадмын бөхөөс тусгай дараагийн өдрүүдэд нь улс, аймгийн цолтой 256 бөх барилдуулж, сурын харваа, жороо морины уралдаан явуулан байлав. Үндэсний бөхийн барилдаанд Улсын гарьд Ж.Бат-Эрдэнэ түрүүлж, гарьд Н.Ганбаатар үзүүрлэв. Баяр наадмын бэлтгэл зохион байгуулалтыг хангахад аймгийн МСУХ-ны тэргүүлэгчид, аймгийн Цагдаагийн газар, Нэгдсэн эмнэлэг, ОБХ, ХХААГ, ХГБХХ-ийн хамт олонтой хамтран ажиллаа

“Алтан морь” шагнал Азийн морин уралдааны холбооны дээд шагнал боллоо Цаашдаа “Алтан морь” шагнал 2 жил тутам зохион байгуулагдах Азийн морин уралдааны холбооны бага хурлын үеэр уламжлал болгон морин спортыг хөгжүүлэх үйлсэд онцгой гавъяа байгуулсан дэлхийн морины зүтгэлтэнд олгогдоно.
ММСУХ 21 аймаг, нийслэл хотод уяачдын зөвлөгөөн зохион байгуулна. ММСУХ нийслэл дүүрэг болон хөдөө орон нутагт ажиллаж амьдардаг уяачид, хурдан морины зүтгэлтнүүд, уралдаанч хүүхдүүд, хамтран ажилладаг байгууллага, иргэд, морь сонирхогчдын санал бодлыг сонсож тэдгээрийн дуу хоолой, санал зөвлөмжийг олон нийтэд хүргэх, холбооны бодлого үйл ажиллагаанд тусгаж ажиллах зорилгоор 2012 оноос эхлэн “Монгол уяач 3000” уяачдын Улсын зөвлөгөөнийг улс орон даяар зохион байгуулж байсан уламжлалтай.
Алдарт шарга азарганы төл даага түрүү магнай боллоо Алдарт шарга азарганы төл даага түрүү магнай боллоо