МОНГОЛЫН МОРИН СПОРТ, УЯАЧДЫН ХОЛБОО УРАЛДААНЧ ХҮҮХДИЙН АЮУЛГҮЙ БАЙДАЛ, ХӨГЖЛИЙН ЖИЛИЙН ХҮРЭЭНД САНАМЖ БИЧИГТ ГАРЫН ҮСЭГ ЗУРЛАА

МОНГОЛЫН МОРИН СПОРТ, УЯАЧДЫН ХОЛБОО УРАЛДААНЧ ХҮҮХДИЙН АЮУЛГҮЙ БАЙДАЛ, ХӨГЖЛИЙН ЖИЛИЙН ХҮРЭЭНД САНАМЖ БИЧИГТ ГАРЫН ҮСЭГ ЗУРЛАА

Монголын морин спорт, уяачдын холбоо (ММСУХ) 2025 оныг “Уралдаанч хүүхдийн аюулгүй байдал, хөгжлийн жил” болгон зарласан билээ. Энэхүү зорилтын хүрээнд уралдаанч хүүхдийн эрх, эрүүл мэнд, аюулгүй байдлыг хангах, хамгаалах, хөгжлийг дэмжих эрх зүйн орчныг бүрдүүлэх чиглэлээр цогц арга хэмжээнүүдийг үе шаттайгаар авч хэрэгжүүлж байна.

Энэ ажлын нэг чухал алхам болж, 2025 оны 7 дугаар сарын 8-ны өдөр Гэр бүл, хөдөлмөр, нийгмийн хамгааллын яам болон Монголын морин спорт, уяачдын холбоо хамтран санамж бичиг байгууллаа.

Санамж бичигт ГБХНХ-ын сайд Т.Аубакир, ММСУХ-ны Ерөнхий нарийн бичгийн дарга Ц.Ганбаяр нар гарын үсэг зурсан бөгөөд хурдан морины уралдаан, сунгаа болон бэлтгэлийн үеэр хүүхдийн амь нас, эрүүл мэнд, аюулгүй байдал, сурч боловсрох эрхийг хамгаалах, стандартын шаардлага хангасан хамгаалалтын хувцас, хэрэгслээр хангах, хууль, тогтоомжийг мөрдүүлэн хэрэгжүүлэх чиглэлээр хамтран ажиллахаар талууд тохиролцлоо.

Санамж бичиг байгуулах үйл ажиллагаанд Хүүхдийн гэр бүлийн хөгжлийн хэлтсийн дарга Б.Баярсайхан, Гэр бүлийн бодлогын газрын дарга Ц.Мөнхзул болон бусад холбогдох албаны төлөөлөл оролцлоо.

ММСУХ нь цаашид уралдаанч хүүхдүүдийн хөгжил, хамгааллыг нэн тэргүүнд тавьж, холбогдох төрийн болон төрийн бус байгууллагуудтай үр дүнтэй хамтран ажиллахаа илэрхийллээ