Мэдээ мэдээлэл

Монгол Улсын Гавьяат малчин, Монгол Улсын Тод Манлай уяач Цэрэнгийн Хэнмэдэх (1939–2025) Таалал төгссөнд гүн эмгэнэл илэрхийлье

ММСУХ

2026/09/15

Монгол Улсын Гавьяат малчин,

Монгол Улсын Тод Манлай уяач

Цэрэнгийн Хэнмэдэх (1939–2025)

Таалал төгссөнд гүн эмгэнэл илэрхийлье

Монголын адууны угшил, хурдан морины уяа сойлгын эрдэм ухаанд амьдралаа зориулсан, уламжлалт уяачийн нэр төр, монгол хүний мөн чанарыг бие сэтгэлээрээ илэрхийлж чадсан Монгол Улсын Гавьяат малчин, Монгол Улсын Тод Манлай уяач,

Төв аймгийн Сэргэлэн сумын уугуул Цэрэнгийн Хэнмэдэх гуай 2025 оны 7 дугаар сарын 1-ний өдөр 86 насандаа тэнгэрийн оронд дэвшсэнд Монголын Морин Спорт, Уяачдын Холбооны нийт гишүүд, уяачид, морь сонирхогч түмэн олны нэрийн өмнөөс гүн эмгэнэл илэрхийлье.

Тэрбээр 1939 онд малчин ардын гэр бүлд мэндэлж, Монгол ахуй, тал нутгийн уудам соёлын дунд өсч хүмүүжсэн нэгэн. Мал сүргийн дэргэд, адууны уяан дээр эрдэм төгсөж, эрийн цээнд хүрсэн цагаасаа эхлэн хурдан морины уяа сойлгонд зүрх сэтгэлээ зориулсан. Ц.Хэнмэдэх гуай олон жилийн уйгагүй хөдөлмөр, ухааныхаа үр дүнд Улс, бүсийн уралдаан наадмуудад айраг түрүү таслалгүй хүртэж, монгол түмний бахархал болсон олон хүлгийг төрүүлсэн түүхтэй.

Түүний уясан “Халзан” азарга, алдарт “Хар” морь зэрэг домогт хүлгүүд үе үеийн наадамчдын сэтгэлд хоногшин үлдэж, Монголын хурдан морины түүхэнд алтан үсгээр бичигдсэн билээ.

Ц.Хэнмэдэх гуай уяачийн ёс зүй, морьтон хүний үлгэр жишээ зан чанараараа олны хүндэтгэлийг хүлээж, залуу уяачдад эрдэм, хүмүүжил сургамж өвлүүлэн монгол уяачийн сэтгэл зүтгэлийг амьдрал дээр үлгэрлэн үзүүлж ирсэн эрхэм буурал байлаа.

Түүний бүтээсэн бахархалт замнал бол морьтон Монгол түмний соёлын өвийг хамгаалж үлдээх ариун үйлсийн түүх юм. Монгол түмний омогшил болсон монгол морины алдар суу, малчин уяач хүний үнэнч хөдөлмөр, өвлүүлэн үлдээх үзэл санаа Цэрэнгийн Хэнмэдэхийн амьдралд шингэн оршиж байлаа.

Түүний нэр алдар, сэтгэл зүтгэл монгол морины уяа шиг бат бөх, үндэсний соёл шиг мөнхөд оршиж, хойч үеийнхэнд гэрэл гэгээ болон гийж үлдэнэ.

Тэнгэрийн хаяанд хүлэг морьдоо уяж, сойж

Түмний сэтгэлд үеийн үед гэрэлтэн орших болтугай.

Монголын Морин Спорт, Уяачдын Холбоо

Санал болгох
Хурдан морь унаач хүүхдүүд стандартын хамгаалалтын малгай хэрэглэлтэй уралдна Дэнж хотойтол наадах монгол наадамдаа монгол түмэн даяараа эсэн мэнд сайхан наадахын төлөө юун түрүүн хурдан морь унаач хүүхдүүдийн аюулгүй байдлыг хангаж наадах нь зүй ёсны хэрэг билээ. Хурдан морь унаач хүүхдүүдийн аюулгүй байдлыг хангаж ажиллахын тулд Стандарчлалын үндэсний зөвлөлөөс 2011 оны 6-р сарын 23-ны 28 тоот тушаалаар баталсан стандартын хамгаалалтын хувцас хэрэглэлээр хангах явдал юм.
Үндэсний их баяр наадмын хурдан эрлийз дунд насны цуваа 1. Төв аймгийн Сэргэлэн сумын уугуул Монгол Улсын Манлай Уяач Ононгийн Батбилэгийн Үзмэн бор үрээг 11 настай Гүндэгмаагийн Отгонбаяр хүү унаж түрүүлгэлээ
ММСУХ-ны 20 жилийн ойн баяр наадмын хурдан соёолонгийн албан ёсны цуваа Монгол Улсын Засгийн газрын тогтоолтой Монголын Спорт, Уяачдын Холбооны түүхт 20 жил, Дэлхийн дээд амжилт Гиннест бүртгүүлсний 2 жил, Уяачдын баяр наадмын хурдан соёолонгийн уралдаанд газар газрын шандаст хурдан 136 соёолон уралдсан юм. Энэ жилийн Үндэсний их баяр наадам, Монгол Улсын Засгийн газрын тогтоолтой бүсийн хурдан морины уралдаанд түрүүлж, айрагдсан хурдан соёлонгууд морьд ирсэн байлаа.